БАРФ ҲАТМАН МЕБОРАД

   Душанбе, 4 январ. (АМИТ «Ховар», Лутфия Эшонқулова). – Ҳавосанҷони Тоҷикистон бар ин назаранд, ки барфи ҳақиқии имсола 7 январ меборад.     Тавре аз Муассисаи давлатии ҳавосанҷии назди Ҳукумати чумҳурӣ ба хабарнигори АМИТ «Ховар» иттилоъ доданд, бо боридани барфи аввал ҳаво дар ҷумҳурӣ сахт хунук мешавад. Ин ҳавои хунук ва паст шудани ҳарорати ҳаво дар кишвар ду рӯз идома меёбад.   «Дар маҷмӯъ, имсол дар ҷумҳурӣ зимистони мӯътадил бо хунукиҳои на он қадар зиёд дар назар дошта шудааст»,- зикр намуд манбаъ.    Дар ҳамбастагӣ ба ин гуфтаҳо метавон ҳаминро афзуд, ки субҳи имрӯз сокинони ҷумҳурӣ шоҳиди боридани барфи кӯтоҳмуддат гардиданд.    Дар назар аст, ки рӯзҳои 5-6-ум дар кишвар ҳаво соф, беабр ва бо ҳарорати мӯътадил боқӣ мемонад.