БАРРАСИИ ЛОИҲАИ ҚОНУН ДАР КӮЛОБ

    Кӯлоб, 10 январ. (АМИТ «Ховар», С.Холов ). – Лоиҳаи Қонуни Ҷумҳурии Тоҷикистон «Дар бораи масъулияти падару модар дар тарбияи фарзанд», ки аз ҷониби Сарвари давлат ба муҳокимаи шаҳрвандон пешниҳод гардид, дар корхонаю ташкилот ва муассисаҳои таълимию фарҳангӣ мавриди баррасӣ қарор гирифтааст. Маорифчиёни шаҳру ноҳияи Кӯлоб низ лоиҳаи қонуни мазкурро дар байни коллективҳои меҳнатӣ муҳокима намуда, қабули онро саривақтӣ мешуморанд. Иштирокдорони ҷамъомадҳо таъкид менамоянд, ки тарбияи фарзанд танҳо вазифаи омӯзгорон набуда, падару модарон вазифадоранд фарзандони худро дар ҳама ҳолат ва ҳамеша дастгирӣ ва назорат намоянд.      Дар ҳамаи ҷаласаҳои падару модарон ва дигар ҳамоишҳо дар доираи муҳокимаи лоиҳаи Қонуни ҶТ «Дар бораи масъулияти падару модар дар таълиму тарбияи фарзанд» қарорҳои дахлдор қабул гашта, волидон андеша ва пешниҳоди худро ба тарзи хаттӣ ба роҳбарияти мактабҳо ирсол менамоянд.