БОЗ ЯК ҚОНУНИ САРИВАҚТӢ ҚАБУЛ МЕГАРДАД

    Душанбе, 5 январ. (АМИТ «Ховар», Лаззат Диловарзод).- Бино ба гуфти доктори илмҳои педагогӣ, академики Академияи маорифи Тоҷикистон Файзулло Шарифзода, қабули қонуне, ки ба урфу одат ва хусусиятҳои миллии мо асос ёфтааст ва аз ҳуқуқҳои табии инсон сарчашма гирифта, ба зиндагии мардум созгор мебошад, дар рушди зеҳнии насли солиму созанда нақши муҳимро иҷро менамояд.     Бо ин мақсад ва ба хотири боз ҳам баланд бардоштани масъулияти падару модар дар таълиму тарбияи фарзанд, инчунин худшиносиву худогоҳӣ, ватандӯстиву ватанпарастӣ, эҳтироми арзишҳои милливу умумибашарӣ, риояи меъёрҳои одобу ахлоқи ҳамида, омода намудани фарзандон ба ҳаёти мустақилона лоиҳаи Қонуни Ҷумҳурии Тоҷикистон «Дар бораи масъулияти падару модар дар таълими фарзанд» ба муҳокимаи мардуми кишвар пешниҳод шудааст, ки мақсади он пурзӯр намудани масъулияти падару модарон дар таълим ва тарбияи фарзандон ва пойдории оила иборат мебошад.