БОЗЁФТИ ИХТИРОЪКОРОНИ ҶАВОН

   Душанбе, 12 январ.(АМИТ «Ховар», Марзия Саидова).-Беш аз 140 номгӯй ихтироот ва лавҳаву овезаҳо дар озмуни «Ихтироъкорони наврас» роҷеъ ба «Соли маориф ва фарҳанги техникӣ» пешниҳод шуданд.    Ғолибони бахшҳои даври ҷумҳуриявии озмун, ки сазовори ҷойҳои якум гардида буданд, бо тавсияномаҳои вазорати маорифи ҷумҳурӣ бе супоридани имтиҳон ба ҳайси донишҷӯ ба муассисаҳои таҳсилоти олии касбии ҷумҳурӣ шомил гардиданд.  Аз вазорати маорифи ҷумҳурӣ ба АМИТ «Ховар» иттилоъ доданд, ки ҳамзамон дар озмуни телевизионии «Бозёфт-2010», ки миёни ҷавонону наврасон баргузор гардид, ғолибони он бо тӯҳфаю мукофот сарфароз гардиданд. Ҳадафи озмун бозёфти истеъдодҳо ва ихтироъкорони ҷавон ва ташаккули донишҳои наву замонавии наврасон буд. Мавриди зикр аст, ки озмуни мазкур бо ташаббуси муассисаи давлатии «Телевизиони наврасону кӯдакон –Баҳористон» ва дастгирии вазорати маорифи кишвар гузаронида шуд.