ДОДАНИ ПОРА ҲАМ ҶИНОЯТ АСТ

   Душанбе, 12 январ. (АМИТ «Ховар», Анварбек Сиддиқов).- «12 ҳолати додани пора ба кормандони прокуратура, ки маблағи аз 500 то 15 000 доллари амрикоиро ташкил медод, дар соҳаи мубориза бо коррупсия ошкор гардида, порадиҳандагон дастгир ва ба ҳабс гирифта шуданд», — қайд кард Прокурори генералии Ҷумҳурии Тоҷикистон Салимзода Шерхони Одина дар нишасти матбуотие, ки дар шаҳри Душанбе гузашт.    Мақомоти тафтишот ва таҳқиқ дар маҷмӯъ тафтиши 7485 парвандаи ҷиноиро ба анҷом расониданд, ки аз ин 6864 парванда ба суд ирсол шуда, 621 парванда қатъ гардидааст.      Муфаттишони мақомоти прокуратура тафтиши пешакии 114 парвандаи ҷиноятии марбут ба одамкуширо ба итмом расонида, ба суд ирсол намуданд. Инчунин ҷиноятҳои қатли одамон, ки солҳои гузашта рух дода буданд, ошкор гардиданд,- иброз намуд Прокурори генералии ҷумҳурӣ.