ФАРОВОНИИ НАМАКИ ОШӢ ДАР ВОСЕЪ

    Восеъ, 21 январ. (АМИТ «Ховар», С.Холов). – Дар ноҳияи Восеъ нишасти матбуотӣ бо иштироки хабарнигорони ВАО баргузор гашт. Султон Валиев раиси ноҳия аз натиҷаи ҷамъбасти яксолаи тараққиёти соҳаҳои иқтисодиву иҷтимоии ноҳия маълумот дода гуфт, ки нақшаи даромади буҷа дар соли 2010 – ум 100, 5 фоиз таъмин гардид. Ба гуфти манбаъ ба буҷа 9411,1 ҳазор сомонӣ маблағ ворид гардида, нақшаи пардохтҳои ҳатмии ҳифзи иҷтимоӣ 111,7 фоиз таъмин гардид.    Инчунин дар нишаст зикр гардид, ки кормандони соҳаи саноати ноҳия дар ин давра ба маблағи 72308 ҳазор сомонӣ маҳсулоти саноатӣ истеҳсол намуданд, ки нисбат ба соли 2009 – ум 5109,9 ҳазор сомонӣ зиёд мебошад. Мавриди зикр аст, ки дар соли сипаригардида дар ноҳия 4680 тонна пахта, 210 тонна гӯшт ва маҳсулоти гӯштӣ, 14600 тонна орд, 601,8 тонна равғани растанӣ, 28030 тонна намаки ошӣ ва дигар маҳсулоти ниёзи мардум истеҳсол шудааст.