ИФТИТОҲИ ХАТСАЙРҲОИ НАВ

    Душанбе, 20 январ. (АМИТ «Ховар», Мавзуна Бойева).- Ҷиҳати иҷрои парвозҳои мунтазам ба Арабистони Саудӣ байни мақомоти ҳавопаймоии Арабистони Саудӣ ва Тоҷикистон Ёддошти тафоҳум ва созишнома оид ба равобити ҳавоӣ ба тасвиб расид, ки дар асоси санадҳои мазкур ширкати ҳавопаймоии «Тоҷик Эйр» барои парвоз ба шаҳрҳои Ҷидда, Ар-риёд ва Даммам иҷоза гирифт, чунин итиллоъ дод имрӯз дар нишасти матбуотӣ ба рӯзноманигорони ватанӣ ва хориҷӣ муовини аввали директори генералии ҶСК «Тоҷик Эйр» Валерий Шарипов.     В.Шарипов ҳамчунин зикр намуд, ки дар давоми соли 2010-ум Ҷамъияти Саҳомии Кушодаи «Тоҷик Эйр» 3148 парвоз анҷом додааст. Дар хатсайрҳои байналмилалӣ аз фурудгоҳҳои ҷумҳурӣ ба 8 шаҳри Федератсияи Россия (Москва, Санк-Петербург, Екатеринбург, Сочи, Сургут, Самара, Новосибирск, Иркутск), ҳамчунин Бишкек, Алма-ато, Киев, Теҳрон, Урумчи ва Шарҷа, дар хатсайрҳои дохилӣ ҳамарӯза парвозҳои мунтазам ба шаҳрҳои Хуҷанду Хоруғ сурат гирифт. Ояндаи наздик тасмим аст ба шаҳри Симферополи Украина, Ашхобод, Қарочӣ ва Кобул парвозҳо ба роҳ монда шаванд,- гуфт дар хотима В.Шарипов.