ИХТИРОЪГАРИ НЕРӮГОҲҲОИ БАРҚӢ

  Душанбе, 28 январ.(АМИТ «Ховар»,Марзия Саидова).-Устоди кафедраи «нархмуайянкунӣ ва суғурта»-и Донишкадаи иқтисодии Тоҷикистон Насриддин Шарофов бо ихтирооти худ — «Нерӯгоҳи хурди барқи обии дарғот» ва «Нерӯгоҳи барқӣ- газӣ» ғолиби озмуни «Устоди эҷодкор» гардид.   Дар ин бора ректори Донишкадаи иқтисодии Тоҷикистон Нозимҷон Нидоев дар ҷамъи хабарнигорон дар Душанбе иттилоъ дод. Озмуни мазкур дар доираи «Соли маориф ва фарҳанги техникӣ» ва мавзӯи «Нақши фарҳанги техникӣ дар ташаккули тафаккур» гузаронида шуд.     Мавриди зикр аст, ки Донишкадаи иқтисодии Тоҷикистон, ки соли равон аз таъсисёбиаш 15 сол сипарӣ мегардад, яке аз муассисаҳои олии таълимии ҷумҳурӣ ба шумор рафта, дар ин даргоҳ беш аз 5 ҳазор донишҷӯён дар бахшҳои рӯзона ва ғоибона аз рӯи 22 ихтисос таҳсил менамоянд. Низоми таҳсил дар Донишкадаи иқтисодии Тоҷикистон шартномавӣ буда, гурӯҳҳои буҷетӣ ва квотавӣ вуҷуд надоранд.