ИСТИФОДАИ НОДУРУСТИ ЗАМИН ДАР МЕҲРОБОДУ БӮСТОН

   Файзобод, 15 январ. (АМИТ «Ховар», Зебо Давлатова). – Ҳафтаи равон дар Қасри фарҳанги ноҳияи Файзобод ҷамъбасти соли сипаришудаи 2010 бо иштироки тамоми раисони ташкилоту муассисаҳо, ҷамоату деҳот, пешқадамони истеҳсолот ва масъулини тамоми соҳаҳо баргузор гардид.    Дар ҷамъомад вазири молия Сафаралӣ Наҷмиддинов иштирок намуд. Раиси ноҳия Абдулло Ҳакимов зимни баромад бурду бохти кормандони тамоми соҳаҳои ноҳияро баррасӣ намуда, аз фаъолияти пасти корхонаи «Шарбат» — и ҷамоати деҳоти Меҳробод, дуруст истифода набурдани заминҳои корами хоҷагиҳои ҷамоатҳои деҳоти Меҳрободу Бӯстон изҳори норозигӣ намуда, масъулини ин ҷамоатҳоро баҳри беҳтар намудани фаъолияташон даъват намуд.    Сипас миёни иштирокдорони ҷамъомад ва вазири молия Сафаралӣ Наҷмиддинов пиромуни таъмин намудани соҳаи маориф ҷиҳати маблағгузорӣ барои бунёди синфхонаҳои иловагӣ, ташкил намудани парки техникӣ дар маркази ноҳия табодули афкор сурат гирифт.