«МАРЗИЧ» — НЕРӮГОҲИ ХУРДИ ПУРИҚТИДОР

Душанбе, 7 январ. (АМИТ «Ховар», Кристина Эрлих). – Дар семоҳаи аввали соли ҷорӣ дар Тоҷикистон боз шаш нерӯгоҳи барқии хурд  сохта  мешавад. Танҳо  дар охири моҳи январ се нерӯгоҳи нави хурд дар ноҳияҳои Рашт, Балҷувон ва Турсунзода ба истифода дода мешаванд. Тавре ба хабарнигори АМИТ «Ховар» аз ШСХК «Барқи Тоҷик» иттилоъ доданд, ҳамаи корҳои сохтмонӣ аз ҳисоби  ширкати  холдингӣ буда, маблағгузорӣ аз ҳисоби Бонки Рушди Исломӣ  мебошад.    Тибқи суханони манбаъ дар семоҳаи аввали соли ҷорӣ   сохтмони боз се нерӯгоҳи хурди иқтидораш пурзӯр: «Марзич»-и  Айнӣ, «Питавқул»-и Ҷиргатол ва «Тоҷ»-и Шахринав дар назар аст. Аз ҳама нерӯгоҳи пуриқтидор нерӯгоҳи барқи обии «Марзич» ба шумор меравад, ки иқтидори он 4 МВт-ро ташкил медиҳад.    Аз ШСХК «Барқи Тоҷик» хабар доданд, ки то охири соли ҷорӣ аз ҳисоби маблағҳои ширкати холдингӣ боз чор НБО-и хурд сохта мешавад. Айни замон лоиҳаи ин нерӯгоҳҳо мавриди таҳлилу баррасӣ қарор дорад.