«МАВЪИЗАҲО» БАРОИ ИМОМХАТИБОН

  Душанбе, 11 январ.(АМИТ «Ховар», Марзия Саидова).-Китоби «Мавъизаҳо»-ро Кумита оид ба корҳои дини назди Ҳукумати ҷумҳурӣ барои имомхатибони кишвар ва ҷиҳати ҷилавгирӣ аз баёни тунди рӯҳониён, ки зимни мавъизаҳояшон ироа мекунанд, омодаи чоп намудааст.   Абдураҳим Холиқов, Раиси Кумита оид ба корҳои дини назди Хукумати ҷумҳурӣ зимни шарҳи ин масъала дар нишасти матбуотӣ ба хабарнигорон иттилоъ дод, ки китоби «Мавъизаҳо» дар ҳаҷми 140 саҳифаи компютерӣ омодаи нашр шудааст, ки он 52 мавзӯъро дар бар гирифта, дар асоси сарчашмаю арзишҳои исломӣ таҳия гардидааст. Бо мақсади таҳияи мавъизаҳои намози ҷумъа аз шумори устодони Донишкадаи Исломии Тоҷикистон, Маркази Исломшиносии назди Президенти Ҷумҳурии Тоҷикистон, Маркази Исломии Ҷумҳурии Тоҷикистон ва Кумита оид ба корҳои дини назди Ҳукумати Ҷумҳурии Тоҷикистон гурӯҳи корӣ таъсис дода шудааст, афзуд А. Холиқов. Мавсуф аз вазъи ироаи мавъизаҳои бархе аз рӯҳониёни кишвар изҳори нигаронӣ намуда гуфт, ки иддае аз рӯҳониёни шинохтаи кишвар зимни мавъизаҳои худ ба хатогиҳои ҷиддӣ роҳ дода, дар ҷомеа ҳисси нафрату бадбинӣ, хусумату ҷаҳолат ва иғворо барангехта, фазои динии кишварро халалдор месозанд. «Кор то ҷое расидааст, ки имомхатиб фарқ байни ҳадиси саҳеҳ ва мавзӯъ намекунад. Аз минбари баланд баромада аз ҳадиси мавзӯъ гап мезанад», гуфт А. Холиқов. Дар ин маврид Кумитаи дин сохтори масъул аст, ки пеши роҳи чунин рӯҳониёнро гирад.  Аз ин рӯ, Кумитаи дин тасмим гирифтааст, ки дар оянда дар ин самт тамоми имкониятҳо ва арзишҳои миллиеро, ки дар ислом вуҷуд доранд, истифода намуда дифоъ аз ҳуқуқҳои шаҳрвандон, бахусус занону модарон намояд то онҳо дар зиндагӣ сазовори мақоми арзанда бошанд.