МИЛИСАҲО СОДИРШАВИИ ҶИНОЯТҲОРО ҶИЛАВГИРӢ КАРДААНД

   Душанбе, 24 январ.(АМИТ «Ховар», Марзия Саидова).-Сатҳи ҷинояткорӣ дар пойтахт дар соли 2010 нисбати соли 2009-ум 10 % кам гардидааст. Тибқи иттилои Қудратулло Ғуломов, сардори шӯъбаи ташкилии нозироти Раёсати корҳои дохилии шаҳри Душанбе аз 3 ҳазору 202 ҷиноятҳои дар соли 2010 ба ҳисобгирифта наздики 2 ҳазору 500 ҷиноят кушода шудааст, ки беш аз 80 % кушодашавии ҷиноятҳоро ташкил медиҳад. Аз ин бар меояд, ки нисбати соли 2009 кушодашавии ҷиноятҳо 3 фоиз афзоиш ёфтааст.    Ҷиноятҳои вазнин низ дар соли сипаригашта 12 % коҳиш ёфта, теъдоди онҳо ба 756 адад мерасад. Аз ҷониби ноболиғон бошад беш аз 170 ҷиноят содир шудааст. Аксари ноболиғони дар пойтахт ҷиноят содир карда аз дигар минтақаҳои кишвар будаанд.    Корманди масъули РКД шаҳри Душанбе ҳамчунин, иттилоъ дод, ки ҷиҳати ҷилавгирии ҷиноятҳо дар пойтахт аз ҷониби кормандони РКД –и пойтахт ҳудуди беш аз 400 ҷорабиниҳои гуногуни оммавию тарғиботи гузаронида шудааст, ки он ба тақвияти тартиботи ҷамъиятӣ ва баланд бурдани маърифати ҳуқуқии мардум мусоидат менамояд.