ММД ДАР ТОҶИКИСТОН БА 24,7 МИЛЛИАРД СОМОНӢ РАСИД

   Душанбе, 18 январ. АМИТ «Ховар», Покиза Маҳмадбекова). — «Маҷмўи маҳсулоти дохилӣ (ММД) дар соли 2010 ба 24,7 миллиард сомонӣ расида, афзоиши он нисбат ба соли 2009 ба 6,5% баробар шуд, ҳаҷми таваррум бошад 9,8% ро ташкил дод», — зикр намуд 17 январ зимни ҳисобот дар маҷлиси васеи Ҳукумати Ҷумҳурии Тоҷикистон вазири молияи кишвар Сафаралӣ Наҷмиддинов.     Вазири молия ҳамчунин иброз намуд, ки дар давоми сол ба Буҷети давлатӣ 6,5 миллиард сомонӣ ворид гардидааст.    Доир ба нишондодҳои рушди иҷтимоию иқтисодӣ дар соли 2010 вазири рушди иқтисод ва савдо Фаррух Ҳамралиев ҳисобот дода, гуфт, ки айни ҳол дар кишвар 60 лоиҳаи сармоягузории давлатӣ бо маблағи умумии 10 миллиард сомонӣ татбиқ мегарданд. Аз ин маблағ 6,3 миллиардаш аз худ карда шудааст.Дар соли сипаригашта, ҳаҷми савдои хориҷӣ 18% афзудааст, вале нишондодҳои воридот ҳамоно аз содирот бештар аст.     Сарвари давлат Эмомалӣ Раҳмон вазири рушди иқтисод ва савдо ва роҳбарони дигар сохторҳои дахлдорро вазифадор намуд, ки барои бартараф намудани тафовути манфии савдои хориҷӣ чораҳо андешанд, то ки ҳаҷми содироти маҳсулоти ватанӣ ва анвои он афзун гардад.