МУҲОФИЗРО БАРОИ ЧӢ КУШТАНД?

    Қурғонтеппа, 14 январ. (АМИТ "Ховар", Мурод Сотиев). – Шаби 10-ум ба 11-уми январи соли ҷорӣ Раҳмон Файзиев, муҳофизи филиали «Ориёнбонк»-и воқеъ дар ноҳияи Данғара аз ҷониби шахсони номаълум дар ҷойи кор кушта шуд.    Мақомоти ҳифзи ҳуқуқи вилояти Хатлон бо мақсади кушодани ҷинояти мазкур тадбирҳои фаврӣ-ҷустуҷӯӣ меандешад.    «Сабаби ба амал омадани ин ҷиноят дар ноҳияи Данғараи вилояти Хатлон айни ҳол номаълум аст, яке аз сабабҳои сар задани ин ҷиноят шояд дуздӣ бошад, зеро ҷинояткорони номаълум барои даромадан ба дохили бино кӯшиши шикастани деворро карданд»,- гуфт ба хабарнигори АМИТ «Ховар» ҷонишини аввали прокурори вилояти Хатлон Юсуфзода Юсуфи Сангаҳмад.