МУТОБИҚСОЗИИ БАҲИСОБГИРИИ МУҲОСИБӢ

Душанбе, 7 январ.(АМИТ «Ховар», Марзия Саидова).- Лоиҳаи Қонуни Ҷумҳурии Тоҷикистон «Дар бораи баҳисобгирии муҳосибӣ ва ҳисоботи молиявӣ» дар ҷаласаи Кумитаи Маҷлиси намояндагон оид ба иқтисод ва молия, ки таҳти раёсати Раиси Кумитаи мазкур Сафаралӣ Раҷабов баргузор шуд,  баррасӣ гардид. Зикр шуд, ки таҳияи лоиҳаи қонун дар шароити гузариш ба иқтисоди бозорӣ, эътирофи шаклҳои гуногуни моликият ва ҷараёни ҷаҳонишавии иқтисодиёт,  мутобиқсозии баҳисобгирии муҳосибӣ ва ҳисоботи молиявӣ ба меъёрҳои байналмиллалӣ аҳамияти муҳим дорад. Аз хадамоти матбуоти палатаи поёнии парлумони мамлакат ба АМИТ «Ховар» иттилоъ доданд, ки ҳамчунин чанде пеш дар ҷаласаи дигари Кумитаи мазкур лоиҳаи Қонунҳои Ҷумҳурии Тоҷикистон «Дар бораи минтақаҳои озоди иқтисодӣ» ва «Оид ба ворид намудани тағйиру иловаҳо ба Қонуни Ҷумҳурии Тоҷикистон «Дар бораи ҳимоя ва дастгирии давлатии соҳибкорӣ дар Ҷумҳурии Тоҷикистон» баррасӣ гардида буд.