НАЗОРАТИ МАҲСУЛОТИ МӮҲЛАТАШ ГУЗАШТА БАР ДӮШИ КИСТ?

   Душанбе, 13 январ.(АМИТ «Ховар», Марзия Саидова).-Мутобиқ ба ворид намудани тағйиру иловаҳо ба Қонуни Ҷумҳурии Тоҷикистон «Дар бораи сифат ва бехатарии маҳсулоти хӯрокворӣ» вазифаи аз муомилот гирифтани маҳсулоти хӯроквории мӯҳлати истеъмолияш гузашта, мавод ва маснуоти бесифат ва хатарнок ба салоҳияти мақомоте гузошта мешавад, ки назорати сифат ва бехатарии маҳсулотро амалӣ мегардонад.   Лоиҳаи ин қонун дар иҷлосияи дуюми Маҷлиси намояндагон қабул гардид. Эшбурӣ Эсанқулов, вакили палатаи поёнии парлумони кишвар дар ҷараёни тавзеҳи масъала гуфт, ки лоиҳаи қонуни мазкур бо мақсади мутобиқгардонии муқаррароти талаботи Созмони Умумиҷаҳонии Савдо ва ворид гардидани Ҷумҳурии Тоҷикистон ба ин созмони байналмилалӣ таҳия гардидааст.