ПИНҲОНКУНИИ АНДОЗ АЗ ҶОНИБИ АНДОЗСУПОРАНДАГОН

   Душанбе, 22 январ. (АМИТ «Ховар», Дилшодаи Ҷонмард).- Дар Кумитаи андози назди Ҳукумати Ҷумҳурии Тоҷикистон ба хабарнигорони ВАО иттилоъ доданд, ки мақомоти андоз дар соли 2010 тибқи Нақшаи тасдиқшуда ва дархости мақомоти ҳифзи ҳуқуқ нисбат ба 2805 андозсупоранда (шахсони ҳуқуқӣ ва воқеӣ) санҷиши риояи қонунгузории андоз гузаронида шуд. Аз ҳисоби санҷишҳои гузаронидашуда дар ҳаҷми 107,5 млн. сомонӣ кам ҳисоб кардан ва пинҳонкунии андозҳо ошкор гардида, аз он 41,7 млн.сомонӣ ба буҷет дохил шудааст, ки 38,8 фоизро ташкил медиҳад.   Барои чораҷӯии минбаъда ба мақомоти ҳифзи ҳуқуқ 192 мавод ба маблағи 80,2 млн. сомонӣ пешниҳод шудааст, ки аз ин ҳисоб ба буҷет 11,7 млн. сомонӣ ворид шуд, ки ин 14,5 фоизи маблағҳои ошкоршударо ташкил медиҳад. Таҳлил ва омўзиши санадҳои санҷиши андоз нишон медиҳад, ки то ҳанӯз андозсупорандагон на танҳо ҳангоми ҳисобу пардохти андозҳо иштибоҳ менамоянд, балки дидаву дониста ба пинҳонкунии андозҳо низ роҳ медиҳанд, — тазаккур дод раиси Кумитаи андоз Нусратулло Давлатов.