ПОРАДЕҲОН ДАСТГИР ГАРДИДАНД

    Душанбе, 24 январ. (АМИТ «Ховар», Анварбек Сиддиқов).- Рӯзи 25 январ нишасти матбуотӣ бо иштироки роҳбарони Агентии назорати давлатии молиявӣ ва мубориза бо коррупсияи ҶТ баргузор мегардад. Вақтҳои охир кормандони ин Агентӣ барои ошкор намудани ҳодисаҳои номатлуб, аз қабили порадеҳию порагирӣ кӯшиши зиёд ба харҷ медиҳанд.    Кормандони Агентии назорати давлатии молиявӣ ва мубориза бо коррупсияи Ҷумҳурии Тоҷикистон дар вилояти Суғд ҳангоми санҷиши молиявӣ дар ҶММ «Петролиум Суғд» муайян намуданд, ки соҳибкори инфиродӣ Ином Бобоев ба камбудиҳои молиявӣ роҳ додааст. Номбурда барои рӯйпӯш намудани кирдорҳои ғайриқонуниаш ба як нафар корманди Раёсати агентӣ дар вилояти Суғд 1000 доллари амрикоиро ба сифати пора пешниҳод намуд. Баъди бо гузориш ба роҳбарияти Агентӣ муроҷиат намудани корманди раёсат соҳибкор Ином Бобоев зимни додани пора аз тарафи кормандони оперативии ҳамин раёсат дастгир шуд.   Тавре аз маркази матбуоти Агентии назорати давлатии молиявӣ ва мубориза бо коррупсияи Ҷумҳурии Тоҷикистон ба АМИТ «Ховар» иттилоъ доданд, мудири хоҷагии Ҷамъияти матлуботи ноҳияи Бобоҷон Ғафуров Ҳайдаралӣ Ваҳҳобов ҳангоми ба кормандони Раёсати агентӣ дар вилояти Суғд пешниҳод намудани 1000 доллари амрикоӣ маблағ ба сифати пора барои нагузаронидани санҷиш оид ба хариду фурӯши қисми бинои ҳамин ҷамъият аз тарафи кормандони оперативии ҳамин раёсат дастгир шуд.   Нисбат ба қазияҳои дар боло номбаршуда тибқи моддаи 320 Кодекси Ҷиноии Ҷумҳурии Тоҷикистон парвандаи ҷиноӣ оғоз гардида, тафтиш идома дорад.