РОҲИ ОҲАН- РОҲИ ҲАЁТ

   Душанбе, 4 январ. (АМИТ «Ховар», Бекназари Абӯбакр). — Дар бозори хизматрасонии нақлиётии вилояти Суғд ҳоло беш аз 50 ширкат фаъолият дошта, дар соли 2010 ба ҳаҷми беш аз 25 млн. тонна борҳои гуногуни хоҷагии халқ ва 140 млн. нафар мусофирон кашонида шуданд.  Сохтмончиёни нақби «Шаҳристон» то ин дам 4 190 метр нақби нақлиётӣ ва 4 480 метр нақби ҳаводиҳанда канда, торафт ба анҷоми корҳои асосӣ наздик меоянд. Барои таҷдиди роҳҳои автомобилгарди шаҳрҳои Хуҷанд, Чкалов ва Қайроққум аз ҳисоби маблағҳои буҷети вилоятӣ 7 млн. сомонӣ, барои таъмири роҳ ва кӯпрук ҷиҳати пайваст намудани ноҳияи Зафаробод ва шаҳри Истаравшан тавассути Уяс — 200 ҳазор сомонӣ, таъмири роҳи автомобилгарди Бӯстон – Комсомол — Фармонқӯрғон — Платина 50 ҳазор сомонӣ маблағ ҷудо гардид.    Аз хадамоти матбуоти раиси вилояти Суғд ба АМИТ «Ховар» иттилоъ доданд, ки даромади тарофавии ташкилоту муассисаҳои алоқаи вилоят беш аз 200 млн. сомониро ташкил дод, ки аз ин 130 млн. ҳазор сомониаш хизматрасонӣ ба аҳолӣ буда, афзоиш нисбат ба ҳамин давраи соли гузашта мутаносибан 17,1 ва 8,6 фоизиро ташкил медиҳад.  Тавассути Корхонаи воҳиди давлатии «Фурудгоҳи байналмилалии Хуҷанд» 234,9 ҳазор мусофир гусел ва 577 тонна бору почта фиристода шуд, ки нисбат ба соли 2009 мутаносибан 115,6% ва 187,3%-ро ташкил дод.    Тавассути роҳи оҳан 6371 ҳазор тонна борҳои гуногуни хоҷагии халқ ва 81,3 ҳазор нафар мусофир кашонида шуд, ки мутаносибан 64,2% ва 45,4%-ро ташкил дод.   Аз ҷониби роҳбарияти КВД «Роҳи оҳани Тоҷикистон» баҳри таъмини супориши Ҳукумати Ҷумҳурии Тоҷикистон ҷиҳати ҳарчи бештар содир намудани маҳсулоти кишоварзӣ дар мувофиқа бо роҳбарияти роҳи оҳани ҷумҳуриҳои ҳамсоя якчанд имтиёз муайян шуд. Чунончӣ, барои кашонидани маҳсулоти зудвайроншавандаи кишоварзӣ бо вагонҳои рефрижераторӣ ба роҳи оҳани Тоҷикистон – 50%, Ӯзбекистон – 40%, Туркманистон – 40% ва Федератсияи Россия – 50% арзиши боркашонӣ арзон карда шуд. Ин боис гардид, ки соли ҷорӣ 233,8 ҳазор тонна маҳсулоти кишоварзӣ, аз ҷумла 132,7 ҳазор тонна пиёз, 12,7 ҳазор тонна меваю сабзавоти гуногун, 7,1 ҳазор тонна консерваҳо ва 81,2 ҳазор тонна меваи хушк содир шавад.