САҲИФАҲОИ НОРӮШАНИ ҲАЁТИ ИКРОМӢ

    Душанбе, 5 январ. (АМИТ «Ховар», Лутфия Эшонқулова).-«Ҷалол Икромӣ. Саҳифаҳои норӯшан»- нашриёти «Шарқи озод» таҳти чунин унвон дар бораи нависандаи Халқии Тоҷикистон Ҷалол Икромӣ китоб чоп намуд.      Китоби мазкур бо мусоидат ва маблағгузории раёсати Швейтсария оид ба рушд ва ҳамкорӣ дар Тоҷикистон интишор гардид.      Муаллифи китоб писари нависанда Ҷонон Икромӣ буда, дар асари мазкур хотироти худро нисбат ба падар, саҳифаҳои ҳаёт ва фаъолияти ӯ, ки солҳои зиёд барои хонандагон ноаён буд, ҳамчунин он душворию азиятҳоеро, ки бар дӯши нависандаи асил афтода буданд, рӯи коғаз овардааст.   Зикр кардан бамаврид аст, ки Ҷалол Икромӣ аз нависандагони тавонои тоҷик ба ҳисоб меравад. Яке аз асарҳои пурарзиш ва калонҳаҷми ӯ романи «Духтари оташ» аст, ки дар он ҳаёти Бухоро дар арафаи сарнагун гардидани аморати Бухоро, солҳои аввали инқилоб ва ҳокимияти халқӣ дар Бухоро бо маҳорати баланд нишон дода шудааст.     Ёдовар мешавем, ки романи мазкур бо мукофоти давлатии ба номи устод Рӯдакӣ сарфароз гардидааст.