САРВАТИ МАЪНАВИИ ДМТ ҒАНИТАР ШУД

     Душанбе, 4 январ. (АМИТ «Ховар», Сангзода Муслиҳиддин).- Тавре масъули китобхонаи илмии Донишгоҳи миллии Тоҷикистон ба хабарнигори АМИТ « Ховар» иттилоъ дод, соли сипаришудаи 2010 барои китобхонаи илмӣ соли бобарор ва хотирмон буд, зеро дар ин сол имкониятҳои китобхонаи мазкур боз ҳам васеъ гардид.   Дар бинои нави Донишгоҳ, воқеъ дар шаҳраки донишҷӯён барои донишҷӯёни факултаҳои илмҳои дақиқ ва табиатшиносӣ китобхонаи нави дорои толори барҳаво бо 150 ҷойи нишаст, хазинаи дорои беш аз 80 ҳазор китоб, толори махсуси хониши электронӣ ва ба шабакаи интернет пайваст ва инчунин, толори ҷудогона барои омӯзгорону муҳаққиқон кушода шуд.     Ин ҳама имконият фароҳам меоварад, ки толибилмон вақти худро бештар ба мутолиаи китоб сарф намоянд.