ШАКЛИ МУОСИРИ ҲИФЗИ ИТТИЛООТ

   Душанбе, 20 январ. (АМИТ «Ховар», Лаззат Диловарзод).- Бо мақсади содда кардани қоидаҳои бақайдгирии субъектҳои хоҷагидор Қонуни Ҷумҳурии Тоҷикистон «Дар бораи бақайдгирии давлатии ашхоси ҳуқуқӣ ва соҳибкорони инфиродӣ» қабул шудааст, ки муносибати мутақобилаи байни мақомоти бақайдгирандаро ба тартиб медарорад.   Дар асоси қонуни мазкур вазифаи бақайдгирии давлатии субъектҳои хоҷагидор ба зиммаи Кумитаи андози назди Ҳукумати ҷумҳурӣ гузошта шудааст. Агентии омори назди Президенти ҶТ раванди додани рамзҳоро дар реҷаи «Онлайн» ба амал мебарорад.   Бино ба иттилои Агентии омори назди Президенти ҶТ, ҳамарўза ба интерфейси он дар бораи бақайдгирии давлатии субъектҳои хоҷагидор иттилоот ворид мешавад ва дар давоми 8 соат рамзгузории автоматикунонидашуда оид ба иттилооти воридшуда ба амал бароварда мешавад,- хабар доданд аз Агентии омори назди Президенти ҶТ ба мухбири АМИТ «Ховар».    Иттилооти коркардашуда баъди ними шаб дар реҷаи шакли XML дар сервиси Кумитаи андоз ҳифз мешавад.