ШАРОБНӮШОН СОКИНИ КАДОМ ДАВЛАТАНД ?

    Душанбе, 25 январ. (АМИТ «Ховар», Мавҷуда Анварӣ).-Сокинони давлатҳои узви бюрои Аврупоии Созмони умумиҷаҳонии тандурустӣ дар миқёси ҷаҳон аз ҳама бештар шароб менӯшанд. Дар ин ҷо миқдори хеле зиёди бемориҳо ва фалокатҳои гуногун, аз ҷумла маҷрӯҳшавиҳо маҳз ба истеъмоли шароб вобастаанд.    Коршиносони Созмони умумиҷаҳонии тандурустӣ сабабҳои истифодаи нӯшокиҳои спиртиро дар кишварҳои гуногуни минтақа муайян намуда, ҳукуматҳоро даъват менамоянд, ки сиёсати зидди шаробнӯширо амалӣ созанд. Онҳо зикр менамоянд, ки аз рӯи ҳисоби миёна ба ҳар сар сокини калонсоли мамлакатҳои аъзои бюрои Аврупоии Созмони умумиҷаҳонии тандурустӣ дар як сол 9, 24 литр машруботи спиртӣ рост меояд.    Дар Эстония ва Чехия аз ҳама бештар шароб менӯшанд. Дар ин мамлакатҳо дар як сол ба ҳар сари аҳолии калонсол 14 литр шароб рост меояд.      Истеъмоли шароб дар Тоҷикистон, Туркия ва Ӯзбекистон нисбат ба мамлакатҳои дигар чандин маротиба камтар аст. Ҳар сокини ин мамлакатҳо ҳар сол ба ҳисоби миёна ҳамагӣ ду литр нӯшокии спиртдор истеъмол менамоянд.