СОДИРОТИ МОЛУ МАҲСУЛОТ МЕАФЗОЯД

   Душанбе, 17 январ. (АМИТ «Ховар», Анварбек Сиддиқов).- « Содироти молу маҳсулот дар соли 2010-ум нисбат ба соли 2009-ум афзоиш ёфтааст. Чунончи содироти нахи пахта дар соли сипаригардида 95 ҳазору 320 тоннаро ташкил дод, ки 8 676 тонна нисбат ба соли 2009 зиёд мебошад »,- гуфт муовини раиси Хадамоти гумруки назди Ҳукумати Ҷумҳурии Тоҷикистон Неъмат Раҳматов дар нишасти матбуотие, ки 17 январ доир гардид.    Инчунин, номбурда қайд кард, ки дар соли сипаришуда дар содироти маҳсулот мавқеи асосиро алюминий, меваю сабзавот, маҳсулоти консервагии меваю сабзавот ва пӯст ташкил доданд.    Хадамоти гумруки назди Ҳукумати Ҷумҳурии Тоҷикистон дар соли 2010 ба хазинаи давлат 1 миллиарду 714,7 миллион сомонӣ ворид намуд, ки ин 92,7 фоизи нақшаи пешбинишударо ташкил дод, гуфт муовини раиси Хадамоти гумруки назди Ҳукумати Ҷумҳурии Тоҷикистон.