ТАҶҲИЗОТИ НАВИ ФУРУДГОҲ
Душанбе, 26 январ. (АМИТ «Ховар», Мавзуна Бойева).-Дар фурудгоҳи Душанбе барои баланд бардоштани сифати хизматрасонӣ ба ҳавопаймоҳо ва ширкатҳои ҳавопаймоии бо фурудгоҳи Душанбе ҳамкоридошта чораҳои амалӣ дида мешавад. Ҳавопаймоҳои замонавӣ вобаста ба тамғаи худ ҳар яке таҷҳизоти хизматрасон доранд ва доштани ҳамин гуна таҷҳизотро аз фурудгоҳҳои ҳамкоридошта тақозо менамоянд. Мошин ва механизмҳои хизматрасон гуногунтамға буда, ҳар яке барои иҷрои кори алоҳида пешбинӣ мешаванд. Тавре маълум аст, имрўзҳо ширкатҳои ҳавопаймоӣ дар қатори ҳавопаймоҳои истеҳсоли собиқ шўравӣ аз ҳавопаймоҳои тамғаи «Боинг» зиёд истифода мекунанд. Таҷҳизот ва дигар мошину механизмҳое, ки ба ҳавопаймоҳо хизмат мерасониданд, бо мурури замон кўҳна шудаанд. Бинобарин роҳбарияти фурудгоҳи Душанбе тасмим гирифтаанд, ки таҷҳизот ва мошину механизмҳои замонавӣ харанд. Дирўз ба фурудгоҳ бештар аз 10 намуд мошину механизмҳо ворид шуданд. Дар қатори зинапоя, дастгоҳи барқдиҳанда, механизмҳои борбардор ва борфурор, мошини барфрўбии махсус барои тоза кардани хати парвоз, дастгоҳи муҳими замонавӣ барои фуровардани контейнерҳо аз ҳавопаймоҳои калонҳаҷм пешбинишуда ва дастгоҳи пошдиҳандаи зидди яхбандӣ ворид шуд. Дар қатори мошин ва механизмҳо 100 адад аробачаи борбардор, ки барои мусофирон пешбинӣ шудааст, дастрас гардид. Боварӣ дорем, ки бо ба кор даровардани мошин ва механизмҳои нав сатҳи хизматрасонӣ ба ҳавопаймоҳо ва мусофирон баланд хоҳад шуд, гуфт дар сўҳбат муовини сардори Хадамоти хизматрасониҳои рўизаминӣ Табар Қурбонов. Дар ин бора ба АМИТ «Ховар» аз маркази матбуоти фурудгоҳи байналмилалии Душанбе хабар доданд.








Дар Кумитаи хоҷагии манзилию коммуналӣ бахшида ба Рӯзи Президент чорабинии тантанавӣ баргузор гардид
Имрӯз дар Тоҷикистон ҳавои тағйирёбандаи бебориш пешгӯӣ мешавад
Дар шаҳри Панҷакент маркази хизматрасонӣ ва тарабхона ба истифода дода шуд
Дар Кӯлоб барои омодагӣ ба ҳолатҳои фавқулода ҷаласа доир шуд
Бахшида ба Рӯзи Президент дар шаҳри Бӯстон Рӯзи дарҳои кушод доир гардид
ПАНҶАКЕНТИ ҚАДИМ. Оид ба омӯзиши он конференсияи илмӣ баргузор шуд
Дар шаҳри Панҷакент фаъолияти корхонаҳои саноатӣ тақвият меёбад
Дар Тоҷикистон масоҳати хонаҳои истиқоматӣ бештар гардидааст
Дар шаҳри Кӯлоб бахшида ба Рӯзи Президенти Тоҷикистон ҳамоиш доир шуд
Мардуми ноҳияи Рашт дар симои Пешвои миллат наҷотбахши миллату давлат, кафили сулҳу ваҳдат ва эҳёгари фарҳанги миллиро мебинанд






