ТАКМИЛИ ФЕҲРИСТИ ДАВЛАТИИ ИТТИҲОДИЯҲОИ ДИНӢ

  Душанбе, 10 январ.(АМИТ «Ховар», Марзия Саидова).-«Зимни такмили феҳристи давлатии иттиҳодияҳои динӣ дар мақомоти давлатӣ оид ба дин 3347 масҷиди панҷвақта, 327 масҷиди ҷомеъ, 31 масҷиди ҷомеъи марказӣ, 1 мадрасаи мутавассита, Маркази исломии Ҷумҳурии Тоҷикистон, 1 ҷамоатхона ва 74 иттиҳодияи динии ғайриисломӣ ба қайд гирифта шудаанд». Ин матлабро 10 январ дар нишасти матбуотӣ ба хабарнигорон Раиси Кумита оид ба корҳои дини назди Ҳукумати ҷумҳурӣ Абдураҳим Холиқов иброз намуд.   Мавсуф афзуд, ки алҳол ҳуҷҷатҳои таъсиси 10 масҷиди ҷомеъи марказӣ барои бақайдгирии давлатӣ, 14 масҷиди ҷомеъ ва 65 масҷиди панҷвақта барои қайди баҳисобгирӣ ба Кумитаи дин пешниҳод гардида, мавриди омӯзиши коршиносон қарор доранд. Ғайр аз ин роҳбарияти Кумитаи дини назди Ҳукумати ҷумҳурӣ бо роҳбарони иттиҳодияҳои динии исломӣ ва сарварони 9 иттиҳодияи динии ғайрисломӣ вохӯрию мулоқот доир намуда, дар он масъалаҳои марбут ба риояи қонунгузории Ҷумҳурии Тоҷикистон дар мавриди озодии виҷдон ва иттиҳодияҳои диниро баррасӣ намуданд.