ТАЪМИРИ ОЗМОИШГОҲҲОИ ТУХМИСАНҶИ

   Душанбе, 27 январ. (АМИТ «Ховар», Лаззат Диловарзод).-Ба иттилои маркази матбуот ва иттилооти Вазорати кишоварзӣ бинои Бозрасии назорати давлатии тухмисанҷӣ, ҳамчунин озмоишгоҳҳои тухмисанҷӣ дар маркази ҷумҳурӣ шаҳри Душанбе ва вилоятҳои Суғду Хатлон аз таъмир бароварда шуда, бо таҷҳизоти санҷишии ҳозиразамон муҷҷаҳаз гардонида шуданд.   Боис ба ёдоварист, ки дар ҳамкорӣ бо Барномаи Оҷонсии байналхалқии Шветсия (SIda) лоиҳаи «Дастгирии инкишофи тухмипарварӣ дар Ҷумҳурии Тоҷикистон» аз соли 2004 инҷониб фаъолият дорад.   Барои татбиқи барномаҳои селексионӣ ба Пажӯҳишгоҳи зироаткории Академияи илмҳои кишоварзии Тоҷикистон, филиали Пажӯҳишгоҳи зироаткорӣ дар вилояти Суғд, кооперативи истеҳсолии ба номи Латиф Муродови ноҳияи Ҳисор, хоҷагии «Чилгазӣ» — и ноҳияи Исфара, стансияҳои навъсанҷии ноҳияҳои Қубодиён, Бобоҷон Ғафуров, Мӯъминобод ва шаҳри Турсунзода техникаю технологияи замонавӣ дастрас гардид.    То моҳи январи соли ҷорӣ наздик ба 31 ҳазор тонна пахтаи тухмӣ коркард шуда, 16 ҳазору 595 тонна чигити тухмӣ истеҳсол шудааст.