ТАНҲО БИНОҲОИ БАЛАНДОШЁНА МЕСОЗЕМ

   Душанбе, 11 январ.(АМИТ «Ховар», Марзия Саидова).- Минбаъд бо сабаби камбуди қитъаи замин дар пойтахт муроҷиати шаҳрвандон на барои сохтмони манзилҳои индивидуалӣ, балки танҳо барои сохтмони биноҳои баландошёнаи бисёрҳуҷрадори истиқоматӣ қабул мешавад. Чунин зикр шуд дар ҷаласаи шаҳрдорӣ, ки дар ҳузури Раиси шаҳри Душанбе Маҳмадсаид Убайдуллоев баргузор гардид.  Ҳадафи асосии ин тадбир мақсаднок истифода намудани қитъаи замин дар пойтахт ва азхудкунии он дар асоси талаботи нақшаи генералии шаҳр мебошад.  Назар ба иттилои котиби матбуотии Раиси шаҳр Шавкат Саидов, алҳол беш аз 25 ҳазор аризаву муроҷиати шаҳрвандон барои дастрасӣ ба қитъаи замин ҷиҳати бунёди манзили истиқоматии индивидуалӣ дар баррасии шаҳрдорӣ қарор дорад.