ТЕЪДОДИ ИНШООТИ ҶАШНӢ ЧАНД АСТ?

  Душанбе, 5 январ.(АМИТ «Ховар», Марзия Саидова).-Беш аз 200 иншооти нави таъиноти гуногундошта дар остонаи ҷашни 20-солагии Истиқлолияти давлатии Ҷумҳурии Тоҷикистон дар пойтахт мавриди баҳрабардорӣ қарор мегиранд. Иншооти мазкур аз ҳисоби маблағҳои буҷетӣ ва соҳибкорон сохта мешаванд.  Мавриди зикр аст, ки дар ҷаласаи шаҳрдорӣ, ки дар ҳузури Раиси шаҳри Душанбе Маҳмадсаид Убайдуллоев баргузор шуд, масъалаи тақвияти корҳои омодагӣ ва татбиқи барномаҳои шаҳрдорӣ ҷиҳати истиқболи ҷашни 20-солагии Истиқлолияти давлатӣ дар сархати масоили асосии ҷаласа қарор дошт.  Зикр шуд, ки минбаъд барои назорати ҷараёни корҳои сохтмонӣ дар иншооти бузурги ҷашнӣ, ба мисли «Душанбе-плаза», Боғи фарҳангу фароғатии умумишаҳрӣ дар Буни Ҳисорак ва Наврӯзгоҳи шаҳрӣ (собиқ ипподром) ҳар ҳафта рӯзи ҷумъа бо иштироки Раиси шаҳр ҷаласаҳои сайёр доир мешаванд.