ТОҶИКИСТОН ХОСТОРИ РАВОБИТИ ҲАСАНА БО КОРЕЯ

   Душанбе, 14 январ. (АМИТ «Ховар», Марзия Саидова).- Масъалаҳои тақвияти равобити гуногунсоҳа, бахусус ҳамкориҳои парлумонии Тоҷикистон бо Кореяи Ҷанубӣ дар меҳвари мулоқоти Шукурҷон Зуҳуров Раиси Маҷлиси намояндагони Тоҷикистон ва Ро Сунг Мин, кордори Сафорати Ҷумҳурии Корея дар Тоҷикистон қарор дошт.  Шукурҷон Зуҳуров роҷеъ ба фаъолияти парлумони касбии мамлакат маълумот дод. Мавсуф зикр кард, ки парлумони касбии Тоҷикистон бо бархе аз парлумонҳои кишварҳои ҷаҳон, бахусус бо парлумони Кореяи Ҷанубӣ гурӯҳи дӯстӣ ва ҳамкорӣ таъсис додааст, ки ин гурӯҳҳо имкон доранд дар тавсеаи равобити байнипарлумонии кишварҳоямон нақши муассир гузоранд.  Раиси Маҷлиси намояндагон арзи сипоси худро ба Ҳукумати Ҷумҳурии Корея ҷиҳати расонидани кӯмакҳои башардӯстонааш ба Ҷумҳурии Тоҷикистон баён карда, хостори таҳкими равобити гуногунсоҳаи Тоҷикистону Кореяи Ҷанубӣ шуд.