ТУРКМАНИСТОН ҲАВАСМАНДИ ҲАМКОРӢ БО ТОҶИКИСТОН

   Душанбе, 26 январ. (АМИТ «Ховар», Покиза Маҳмадбекова).-Дурнамои муносибатҳои тиҷоратӣ-иқтисодӣ миёни Тоҷикистону Туркманистон дар ҷараёни мулоқоти муовини аввали раиси Палатаи савдо ва саноати Ҷумҳурии Тоҷикистон Одил Сангов ва ҳайати туркманҳо бо роҳбарии сардори шӯъбаи кор бо аъзои палатаҳо ва ҳамкориҳои байналмилалии Палатаи савдо ва саноати Туркманистон Элмира Раҳмонова баррасӣ шуд.      Одил Сангов дар бораи мақом ва фаъолияти Палатаи савдо ва саноати Ҷумҳурии Тоҷикистон, дар бораи аъзо ва хизматрасониҳои онҳо дар ташкили намоишгоҳҳое, ки дар ҷумҳурӣ ва берун аз он мегузаранд, ҳарф зад.     Элмира Раҳмонова иттилоъ дод, ки Палатаи савдо ва саноати Туркманистон барои ҳамкорӣ бо ҳамкасбони тоҷик ҳавасманд аст. Зимни мулоқот, ҳамчунин дар бораи азнав баррасӣ намудани Созишномаи ҳамкории байнипалатагӣ, иштироки якҷоя дар намоишгоҳҳои ташкилмешуда ва табодули мунтазами маводи иттилоотӣ сухан рафт.