ВУСЪАТИ КОРҲОИ НАҚБКАНӢ ДАР «ШАҲРИСТОН»

    Душанбе, 11 январ. (АМИТ «Ховар», Бекназари Абӯбакр). — Раҳоӣ аз бунбасти коммуникатсионӣ яке аз ҳадафҳои асосии Ҳукумати Ҷумҳурии Тоҷикистон мебошад. Дар ин радиф бунёди нақби «Шаҳристон», ки ифтитоҳи он соли равон дар назар аст, аҳамияти махсус дорад.     Алҳол корҳои сохтмонӣ дар нақби «Шаҳристон» босуръат идома дошта, аз оғози сохтмон то 1 январи соли 2011 ба масоҳати 4261 метр нақби нақлиётӣ ва 4531 метр нақби ҳаводиҳанда канда шудааст. Барои иҷрои ҳаҷми корҳои нақбканӣ дар ин рӯзҳо 355 нафар мутахассисони муҳандисию–техникӣ, аз ҷумла 80 нафар коргарони маҳаллӣ сафарбар гардидаанд.    Хадамоти матбуоти раиси вилояти Суғд хабар медиҳад, ки тибқи ҷадвали тасдиқгардидаи мақомоти иҷроияи ҳокимияти давлатии вилояти Суғд бояд намояндагони мақомоти иҷроияи ҳокимияти давлатии шаҳру ноҳияҳои вилоят дар мӯҳлатҳои наздик аз ҷараёни сохтмони нақби «Шаҳристон» дидан намуда, ба коргарони ин иншооти муҳим маводи хӯрокӣ дастрас намоянд.