ЯҒНОБИҲО МАКТАБ ВА БУНГОҲИ ТИББӢ МЕСОЗАНД

   Душанбе, 10 январ. (АМИТ «Ховар», Бекназари Абӯбакр). — Тибқи нақшаи чорабиниҳои мақомоти иҷроияи ҳокимияти давлатии вилояти Суғд раиси ноҳияи Айнӣ Рустам Раҳматов, муовини ӯ Акрам Қосимов, сармеъмори ноҳия Одил Одилов ва сардори ҶММ «Фалғар» Шавкат Саидов аз мавзеи соҳили Пуларовути водии Яғноб дидан намуданд. Ин ҷо барои мардуми муқими деҳоти Тасех, Таги чанор, Ғармайн, Наметкон ва Пуларовут тариқи ҳашар мактаб ва бунгоҳи тиббӣ бунёд мешавад.   Аз хадамоти матбуоти раиси вилояти Суғд ба АМИТ «Ховар» иттилоъ доданд, ки бо ин мақсад аз буҷаи вилоят 36,6 ҳазор сомонӣ маблағ ҷудо гардида, ба миқдори кофӣ семент, чӯбу тахта, тунука харид ва захира шудааст.