АМАЛИШАВИИ ӮҲДАДОРИҲОИ ЁДДОШТИ ТАФОҲУМ

   Душанбе, 15 феврал. (АМИТ «Ховар», Лаззат Диловарзод).- Вазорати меҳнат ва ҳифзи иҷтимоии аҳолии Ҷумҳурии Тоҷикистон (ҶТ) ва намояндагии Ассотсиатсияи олмонии «Каритас» дар ҶТ, бо назардошти рушди минбаъдаи сохторҳои давлатӣ ва ғайридавлатие, ки ба аҳолии Тоҷикистон хизматрасонии иҷтимоиро пешниҳод менамоянд, чанде пештар Ёддошти тафоҳум (Меморандум) оид ба ҳамкорӣ дар самти пешниҳод намудани хизматрасонии иҷтимоӣ ба аҳолиро ба имзо расониданд.    Бо мақсади амалӣ гардонидани ӯҳдадориҳое, ки дар Ёддошти тафоҳум оварда шудаанд, дар бинои асосии «Маркази таълими калонсолони Тоҷикистон» барои хизматрасонии иҷтимоӣ ба пиронсолони яккаю танҳо, шахсони имконияташон маҳдуд, ба кӯдакон ва ҷавонони эҳтиёҷманд ҳамарӯза хизматрасонии иҷтимоӣ расонида мешавад. Ба эҳтиёҷмандон ҳамчунин мутахассисони соҳаи ҳуқуқ ва равоншиносӣ хизмат мерасонанд.