АВТОМАШИНА БА ДАРЁ АФТИД

Душанбе, 8 феврал. (АМИТ «Ховар», Анварбек Сиддиқов). —  6 феврали соли ҷорӣ тахминан соатҳои 20. 30 дақиқа дар километри  121-уми шоҳроҳи Душанбе-Хуҷанд   дар мавзеи Сафедораки ноҳияи  Айнӣ автомашинаи тамғаи «Муссо»  рақами давлатиаш ВТ 17-66 01 РТ ба дарё афтид.  Бар асари   ин ҳодиса 3 нафар ҷароҳати ҷисмонӣ бардошта, 1 нафар ҳалок ва 2 нафар бедарак гардид.        Тавре аз маркази матбуоти Кумитаи ҳолатҳои фавқулодда ва мудофиаи граждании назди Ҳукумати Ҷумҳурии Тоҷикистон ба АМИТ «Ховар» хабар доданд,  7 феврал дастаи зудамали ситоди ҳолатҳои фавқулоддаи вилояти Суғд ҷасади яке аз бедаракшудагон- ронандаи автомашинаро аз даруни дарё дарёфт намуд.  Кофтукови нафари  дигар идома дорад.