БАРҚИЯИ ТАБРИКИИ Э.РАҲМОН БА МАҲМУДИ АҲМАДИНАЖОД

   Душанбе, 12 феврал. (АМИТ «Ховар»).- Президенти Ҷумҳурии Тоҷикистон Эмомалӣ Раҳмон унвонии Раиси Ҷумҳурии Исломии Эрон Маҳмуди Аҳмадинажод барқияи табрикӣ ирсол намуд, ки дар он аз ҷумла гуфта мешавад.    Ҷаноби Олӣ,   Шумо ва тамоми мардуми бародари Эронро бо фарорасии ҷашни миллӣ – сиюдуюмин солгарди Инқилоби Исломӣ самимона табрику таҳният мегўям.    Боиси қаноатмандӣ ва хушнудии мост, ки тўли солҳои ахир, бар асари саъю кўшишҳои ҳар ду ҷониб, муносибатҳои дўстӣ ва ҳамкориҳои мутақобилан судманд сатҳи сифатан навро касб намуданд. Дар ин ҷода густариш ва таҳкими равобити дуҷониба ва чандҷониба дар арсаҳои бунёдӣ, қабл аз ҳама дар бахши иқтисодӣ, нақши бузург дорад ва хоҳад дошт.   Дар ин рўзи фархунда ба ҷаноби Олӣ сиҳатии комил ва пирўзиҳои ҷадид, ба мардуми дўсти Эрон – саодат, амонӣ ва хонаободӣ таманно дорам.