БАРГУЗОРИИ ФОРУМИ ИҚТИСОДИИ ИДМ ДАР МАСКАВ

Душанбе,  1 феврал. (АМИТ «Ховар», Покиза Маҳмадбекова). – Форуми иқтисодию байналмилалии кишварҳои узви ИДМ «20 сол дар якҷоягӣ: таҷрибаи ҳамкорӣ ва дурнамо» 18 марти соли ҷорӣ дар шаҳри Маскав баргузор мегардад. Дар ин бора ба хабарнигори АМИТ «Ховар» котиби матбуотии маркази коргузории рушди иқтисодии ИДМ Александр Калугин хабар дод. Дар чорабиние, ки Кумитаи иҷроияи ИДМ ва маркази коргузории рушди иқтисодии ИДМ ташкил намудаанд, намояндагони мақомоти иҷроия ва мақомоти қонунгузорӣ, соҳибкорони хусусӣ, ташкилотҳои бузургтарини сармоягузорӣ ва молиявӣ, марказҳои тадқиқотӣ ва коршиносӣ, иттифоқҳои касаба ва дигар иттиҳодияҳои давлатҳои Иттиҳод иштирок менамоянд.    Тибқи иттилои директори генералии маркази коргузорӣ ва рушди иқтисодии ИДМ Владимир Савченко дар чаҳорчӯби форум муҳокимаи Стратегияи рушди иқтисодии ИДМ то соли 2020, масоили муҳими Шартнома дар бораи минтақаи озоди тиҷоратӣ ва барномаи байнидавлатии ҳамкориҳои инноватсионии ИДМ то соли 2020, натиҷаҳои фаъолияти Иттиҳоди гумрукӣ ва дурнамои ташкили фазои ягонаи иқтисодӣ дар назар аст.    Миёни дигар мавзӯъҳои рӯзномаи кории Форум- пешниҳоди роҳбарии  Ҷумҳурии Тоҷикистон  дар раёсати ИДМ дар соли 2011 дар фазои якҷояи иқтисодӣ, масъалаҳои мусоидат ба барқарорсозии робитаҳои манфиатноки корӣ  миёни намояндагони иттиҳодияҳои тиҷоратии давлатҳои узви Иттиҳод, дастгирӣ ва инкишофи лоиҳаҳои бештар аҳамиятдошта ва ҷалби сармоягузорону фармоишгарон ҷой дорад.