ЭРОН ТАБОБАТГОҲИ ҶАРРОҲИИ ПЛАСТИКӢ МЕСОЗАД

   Душанбе, 28 феврал. (АМИТ «Ховар», Лаззат Диловарзод).- Аз сафорати Ҷумҳурии Исломии Эрон (ҶИЭ) дар Тоҷикистон иттилоъ доданд, ки ширкатҳои хусусии ҶИЭ тайёранд дар пойтахти Ҷумҳурии Тоҷикистон беморхонаи касалиҳои чашм, ҷарроҳии пластикӣ ва  беморхонаи махсусгардонидашудаи гурда ва бемориҳои урологиро сохта ба истифода диҳанд.    Айни замон ин мавзӯъ дар Вазорати тандурустӣ мавриди омӯзиш қарор дорад.    Дар намояндагии сафорати ҶИЭ ба  он боваранд, ки бо бунёди ин муассисаҳои табобатии тиббӣ шаҳрвандони Тоҷикистон бо харҷи маблағи камтарин  метавонанд, ки дар ватани худ табобати хуб гиранд.    Сафорати ҶИЭ дар давоми ҳар моҳ барои гирифтани табобат дар муассисаҳои табобатии Эрон ба шаҳрвандони Тоҷикистон 100  рухсатнома (виза) дода метавонад, ки ин хеле кам аст, аз ин рӯ  сохтану ба истифода додани беморхонаҳои зикршуда барои шаҳрвандони Тоҷикистон ҳам арзон ва ҳам мувофиқ мебошад.