ГЕРОИН ДАР ТАГИ ПОЙАФЗОЛ

Душанбе, 5 феврал. (АМИТ «Ховар», Анварбек Сиддиқов). — Кормандони Хадамоти гумруки назди Ҳукумати Ҷумҳурии Тоҷикистон аз гардиши ғайриқонунии маводи нашъаовар 861,5 грамм героин мусодира намуданд. Тавре аз маркази матбуоти Хадамоти мазкур ба АМИТ «Ховар иттилоъ доданд», кормандони Раёсати минтақавии  гумрукӣ дар шаҳри Душанбе  ҳангоми барасмиятдарорӣ ва назорати гумрукии  мусофирони хатсайри   рақами 627  самти Душанбе-Маскав  шаҳрванд Латофат Шарипова (соли таваллудаш 1982)-ро  дар интиқоли ғайриқонунии маводи нашъаовар  гумонбар дониста, аз парвоз боздоштанд.          Кормандони гумрук ҳангоми муоинаи шахсии боздоштшуда  аз дохили астари гиребони палто 38 дона, аз таги миёнбанди занона 36 дона ва аз меъдаи ӯ 13 дона,  ҷамъ 87 адад ғилофакҳои селофании дорои хокаи сафеди монанд ба  героинро дарёфт ва мусодира намуданд.         Инчунин дар вақти аз назорати гумрукӣ гузаронидани мусофирони хатсайри №254 самти Хуҷанд-Қазон бинобар рафтори шубҳаовар  шаҳрванд Валияхон  Ахмедова (соли таваллудаш 1965)-ро аз парвоз боздоштанд.         Дар рафти тафтиш маълум гардид, ки шаҳрванд Валияхон Ахмедова дар таги пойафзоли худ ду бастаи селофании дорои хокаи сафеди ба героин монандро  пинҳон намуда мехост ба Федератсияи  Русия интиқол диҳад.         Маводи дарёфтгардида аз тарафи кормандони гумрук дар асоси санадҳои тартибдодашуда мусодира  шуда, барои ташхис  ирсол гардид.         Мутобиқи  хулосаи коршиносон  маводи   нашъаовари  дарёфт шуда   навъи героин буда,  аз  шаҳрванд Латофат Шарипова 481,5 грамм ва аз шаҳрванд Валияхон Ахмедова 380  граммро ташкил дод.         Нисбат ба шахсони қонуншикан парвандаҳои ҷиноӣ  оғоз  шуда тафтиш идома дорад.