ХУРРАМГАРДОНИИ КАНОРИ ШОҲРОҲҲО

Душанбе, 9  феврал. (АМИТ «Ховар», Дилшодаи Ҷонмард). — Имрӯз  вобаста ба иҷрои  дастуру супоришҳои  ҳамешагии Сарвари давлат Эмомалӣ Раҳмон  дар мавриди  вусъат бахшидани  корҳои  ободонию  созандагӣ ва рушди соҳаи ниҳолпарварӣ дар ҳузури Сарвазири  мамлакат Оқил Оқилов   доир ба ташкили саривақтии  корҳои ниҳолшинонӣ  ва сабзу хуррамгардонии шаҳру ноҳияҳои мамлакат машварати корӣ  баргузор гардид.     Дар машварат таваҷҷӯҳи асосӣ ба масъалаи вусъати корҳои  ниҳолшинонӣ ва сабзу хуррамгардонии канори  шоҳроҳҳои байналмилалию байнишаҳрӣ ва байниноҳиявии қаламрави мамлакат, аз ҷумла  шоҳроҳҳои  Душанбе- Ҷиргатол  ва  Душанбе — Турсунзода   зоҳир гардид. Роҳбарони вазорату идораҳои дахлдори мамлакат ва роҳбарияти як қатор шаҳру ноҳияҳои ҷумҳурӣ   вазифадор гардиданд, ки дар ин   самт тадбирҳои зарурӣ андешида, дар баробари пешбурди корҳои ободонӣ  дар шаҳру ноҳияҳо,  ҳамзамон ба масъалаи ниҳолшинонӣ ва сабзу хуррамгардонии  канори шоҳроҳҳои  кишвар   диққати зарурӣ диҳанд.