ИХТИСОСИ 500 МИЛЛИОН ДОЛЛАР БАРОИ БУНЁДИ КОРХОНАИ СЕМЕНТ

   Душанбе, 17 феврал. (АМИТ «Ховар», Мавзуна Бойева).- Дар доираи мулоқоти кории комиссияи Кумитаи муштараки ҳамкориҳои саноатӣ ва маъдан имрӯз дар Вазорати энергетика ва саноати Ҷумҳурии Тоҷикистон ва ширкати саҳҳомии пӯшидаи «Лион Ковон Кониҳои Симони байналмилал»-и Ҷумҳурии Исломии Эрон дар соҳаи сохтмон ва баистифодадиҳии корхонаи сементбарорӣ дар Тоҷикистон созишнома ба имзо расид.   Мутобиқи санади мазкур ширкати «Лион Ковон Кониҳои Симони байналмилал»-и Ҷумҳурии Исломии Эрон дар Ҷумҳурии Тоҷикистон корхонаи сементбарорӣ бунёд менамояд, ки иқтидори он истеҳсоли 2 миллион тонна дар як сол буда, дар ду марҳила сохта ба истифода дода мешавад.    Мувофиқи ҳисоби пешакӣ маблағи сохтмони корхона 500 миллион доллари ИМА-ро ташкил медиҳад.   Созишномаро Вазири энергетика ва саноати Ҷумҳурии Тоҷикистон Гул Шералӣ ва мудири омили ширкати «Лион Ковон Кониҳои Симони байналмилал» Ғуломҳайдар Иброҳимбой Саломӣ ба имзо расониданд.