МАҲФИЛИ ҶАВОНОНИ ДАВРОНИ ИСТИҚЛОЛ

   Душанбе, 14 феврал. (АМИТ «Ховар», Дилшодаи Ҷонмард).- 15 феврали соли равон дар маркази имкониятҳои ҷавонони ноҳияи Данғара маҳфили ҳозирҷавобон зери унвони «Мо ҷавонони даврони истиқлол» баргузор мегардад, ки дар чорабинии мазкур дастаҳои ҷавони шаҳру ноҳияҳои интихобии минтақаи Кӯлоби вилояти Хатлон иштирок менамоянд.  Мавриди зикр аст, ки ташаббускори ин иқдом Кумитаи ҷавонон, варзиш ва сайёҳии назди Ҳукумати Ҷумҳурии Тоҷикистон ва ташкилоти ҷамъиятии «Нидои дӯстон» буда, он ба 20 солагии Истиқлолияти давлатии кишвар, баррасии лоиҳаи Қонуни Ҷумҳурии Тоҷикистон «Дар бораи масъулияти падару модар дар тарбияи фарзанд», татбиқи «Барномаи саломатии Ҷумҳурии Тоҷикистон барои солҳои 2011-2013» ва лоиҳаи «Фароҳам овардани шароити мусоид оид ба рушди имкониятҳои иҷтимоию иқтисодии ҷавонони Тоҷикистон» бахшида мешавад.  Дар ин бора ба хабарнигори АМИТ «Ховар» аз бахши иттилоотию таҳлилии Кумитаи мазкур иттилоъ доданд.