МАҲСУЛОТИ АРЗОНИ «ТОҶИКМАТЛУБОТ» ДАР КӮЛОБ

   Кӯлоб, 16 феврал. (АМИТ «Ховар», С.Холов). – Ҳадафи асосии ташкили ярмаркаҳои ҷамъиятӣ аз ҷониби матлуботчиёни минтақаи Кӯлоб пеш аз ҳама ба танзим даровардани нархи маводи хӯрокворӣ мебошад. Бо ин мақсад дар бозори «Саховат»- и шаҳри Кӯлоб шурӯъ аз 13 – уми феврал ҳамарӯза ярмаркаи фурӯши маҳсулоти хӯрокворӣ гузаронида мешавад. Дар рӯзи аввали он Ҷамъияти матлуботи шаҳри Кӯлоб, матлуботчиёни ноҳияи Темурмалик, раёсати бозори «Саховат» ва матлуботчиёни ноҳияи Ховалинг 40 тонна орд, 38 тонна картошка, 30 тонна пиёз, 10 тонна сабзӣ ва равғану асалро бо нархи нисбат ба бозор арзон ба фурӯш бароварданд. Маҳсулоти ба фурӯш баровардаи матлуботчиёни ноҳияи Ховалинг истеҳсоли маҳаллӣ буда, сифати хуб дошт.    Дар ин фурӯшгоҳ ҳама намуди маҳсулот бо нархи чакана ба фурӯш бароварда шуд. Сокинони шаҳри Кӯлоб ин иқдомро бо хушнудӣ пазируфтанд ва пайваста баргузор намудани чунин ярмаркаҳоро муфид арзёбӣ намуданд.   Мувофиқи нақша гузаронидани ярмаркаҳои фурӯши маводи хӯрокӣ дар маркази шаҳри Кӯлоб то ҷашни Наврӯз идома ёфта, дар он ҳамаи ҷамъиятҳои матлуботи минтақа ширкат меварзанд.