МАШВАРАТИ КОРӢ ДАР ҲУЗУРИ САРВАЗИР

Душанбе, 4 феврал. (АМИТ «Ховар», Бекназари Абӯбакр). — Дирӯз, 3 феврал дар ҳузури Сарвазири Ҷумҳурии Тоҷикистон Оқил Оқилов оид  ба рушди иқтисодию  иҷтимоии  шаҳраки Шўроби шаҳри Исфара машварати корӣ доир гардид. Дар машварат масоили таҳия ва татбиқи «Барномаи рушди иқтисодию  иҷтимоии шаҳраки Шўроб барои давраи солҳои 2011-2015» мавриди баррасӣ қарор дода шуд. Барномаи мазкур масъалаи эҳёи пурраи шаҳраки Шўроб, аз ҷумла тармим ва азнавсозии биноҳои истиқоматӣ, таъмини шароити зарурии зист, ташкили ҷойҳои корӣ, бунёди иншооти маорифу фарҳанг, тандурустӣ ва варзишӣ, таъминоти оби нушокӣ ва барқ, инчунин афзун  гардонидани истеҳсоли ангишт дар конҳои ангишти ҳудуди шаҳраки Шўроб ва бунёди маркази барқу гармидиҳиро дар бар мегирад. Оқил Оқилов роҳбарони вазорату идораҳои мамлакат ва дигар шахсони масъулро вазифадор кард, ки «Барномаи рушди иқтисодию  иҷтимоии шаҳраки Шўроб барои давраи солҳои 2011-2015»-ро таҳия карда, ба ҳукумати мамлакат пешниҳод намоянд ва баъд аз қабул гардидани барнома дар татбиқи саривақтии он чораҳои бетаъхир андешанд.