МУЛОҚОТИ Қ.РАСУЛЗОДА БО А.КУДАЙБЕРДИЕВ

Душанбе, 9 феврал. (АМИТ «Ховар», Бекназари Абӯбакр). — Масоили ҳамкориҳои судманди вилояти Суғд ҳамчун минтақаи аҳамияти бузурги сиёсиву иқтисодидоштаи Ҷумҳурии Тоҷикистон бо Ҷумҳурии Қирғизистон 8 феврал дар мулоқоти раиси вилояти Суғд Қоҳир Расулзода бо вазири мудофиаи Ҷумҳурии Қирғизистон Абибилла Кудайбердиев дар шаҳри  Хуҷанд мавриди баррасӣ қарор гирифт. Тавре аз хадамоти матбуоти раиси вилояти Суғд ба АМИТ «Ховар» иттилоъ доданд, дар ҷараёни мулоқот таъкид гардид, ки муносибатҳои дӯстонаи халқҳои тоҷику қирғиз решаҳои мустаҳками таърихӣ доранд. Имрӯз дар вилояти Суғд имкониятҳои мусоиди  иқтисодӣ барои густариши муносибатҳои гуногунҷабҳа бо Ҷумҳурии Қирғизистон мавҷуданд. Аз ҷумла, ба масъалаҳои инкишофи самти иҷтимоӣ, равобити дуҷонибаи шаҳрвандон,  содироту воридоти маҳсулот ва муносибатҳои тиҷоратӣ диққати ҷиддӣ дода мешавад. Қоҳир Расулзода  ба меҳмонон оид ба рушди хоҷагии халқи вилоят, аз ҷумла иқтисодиёт маълумот дод. Раиси вилоят, қайд намуд ки ҳамкориҳои дуҷонибаи вилояти Суғд бо вилоятҳои  Ҷумҳурии Қирғизистон хуб ҷараён дорад. Вазири мудофиаи Ҷумҳурии Қирғизистон Абибилла Кудайбердиев  изҳор дошт, ки ҳамкориҳои дуҷониба тибқи дастуру супоришоти Президентҳои  ҳарду кишвари ба ҳам дӯсту ҳамсоя ва Комиссияи байнидавлатӣ бобати баррасии  масъалаҳои марзӣ, таъмини обу  робитаҳои наздисарҳадӣ сурат мегиранд. Мавриди ёдоварист, ки ҳадафи асосии ташрифи роҳбарияти Вазорати мудофиаи Ҷумҳурии Қирғизистон ба вилояти Суғд  мулоқот бо вазири мудофиаи Ҷумҳурии Тоҷикистон буда, дар  ин мулоқоти расмӣ масъалаҳои вобаста ба вазъи ҳарбӣ ва таъмини амнияти минтақа мавриди баррасӣ қарор гирифтанд.