НЕЪМАТҶОН ЗИМНИ ПОРАДИҲӢ ДАСТГИР ШУД

Душанбе, 4 феврал. (АМИТ «Ховар», Анварбек Сиддиқов). – Чанде қабл кормандони мақомоти ҳифзи  ҳуқуқи ҷумҳурӣ ҳангоми гузаронидани амалиёти фаврӣ- ҷустуҷӯӣ дар утоқи кории муфаттиши калони прокуратураи шаҳри Конибодом Наим Оқилҷонов  менеҷери беморхонаи марказии шаҳри  Конибодом Неъматҷон Ғаниевро  ҳангоми додани пора ба маблағи 22 000 сомонӣ дастгир намуданд.  Номбурда бо мақсади мусбат ҳал намудани маводи санҷишии дар истеҳсолот будаи Н.Оқилҷонов нисбат ба  мудирони шўъбаҳои ҷарроҳӣ ва қабулгоҳи беморхонаи мазкур Шукрулло Норматов   ва Раҳим Маҳкамов дар хусуси аз ҷониби онҳо талаб намудани маблағ аз беморон барои гузаронидани ҷарроҳӣ пора пешниҳод кардааст. Тавре аз маркази матбуоти ВКД-и Ҷумҳурии Тоҷикистон ба АМИТ «Ховар» иттилоъ доданд, аз рӯи ин ҳодиса бо назардошти  далелҳои шайъӣ парванда оғоз гардид.