ОБИ ОШОМИДАНӢ ТАШВИШИ ҶАҲОНӢ ХОҲАД ШУД

  Душанбе, 21 феврал. (АМИТ «Ховар», Лаззат Диловарзод). — Дар асоси таҳлили мутахассисон муайян шудааст, ки масоҳати захираи пиряхҳои Тоҷикистон  дар зарфи 60 – 61 соли охир 30 фоиз кам шудааст.    Дар натиҷаи мушоҳидаи олимон  тайи 10 соли охир бо сабаби гармшавии ҳаво обшавии яхҳо зиёд гардида, захираи яхҳои ҷумҳурӣ башиддат кам шуда, дар назди пряхҳо пайдо шудани кӯлҳои нав мушоҳида мегардад, ки онҳо хатари кандашавӣ доранд.    Дар асоси пешгӯиҳои илмї,  дар муддати 30 соли оянда дар натиҷаи баланд шудани ҳарорати ҳаво зиёд  шудани сатҳи оби кӯлу дарёҳо дар минтақаи Осиёи Марказӣ дар назар аст. Баъди гузаштани ин давра  камшавии оби ошомиданӣ дар кӯлу дарёҳо пешбинӣ мешавад, ки барои минтақа ва ҷаҳон ташвишҳои нави нарасидани оби ошомиданиро ба миён меорад.             Калонтарин кӯли минтақа, ки дар баландии 3265 метр аз сатҳи баҳр ҷойгир  аст, кӯли Сарез дар Тоҷикистон мебошад, ки 25 млн. нафар аҳолиро бо оби ошомидании тозатарини экологї дар олам таъмин карда метавонад.