ОБОДОНИИ МУҶАССАМАҲО, ЁДГОРИҲО ВА ОРОМГОҲҲО ДАР СУҒД

   Душанбе, 17 феврал. (АМИТ «Ховар», Бекназари Абӯбакр). — Мақомоти иҷроияи ҳокимияти давлатии шаҳру ноҳияҳои вилояти Суғд ба муносибати 18 — солагии таъсисёбии Қувваҳои Мусаллаҳи Ҷумҳурии Тоҷикистон ҷиҳати ободонии ёдгориҳо ва муҷассамаҳои ба хотири шаҳидон гузошташуда, оромгоҳҳои сарбозон ва афсарони фавтида, дастгирии моддию маънавии иштирокчиён ва маъюбони Ҷанги Бузурги Ватанӣ, ҷанговарони байналмилал, ҳимоятгарони сохти конститутсионӣ дар Ҷумҳурии Тоҷикистон тадбир андешида, чорабиниҳои фарҳангию маърифатӣ ташкил менамоянд.    Бо назардошти он ки санаи 23 феврали соли 1993 Қувваҳои Мусаллаҳи Ҷумҳурии Тоҷикистон таъсис ёфта, чун рукни муҳими давлати тоҷикон барои ҳифзи сулҳу субот дар кишвар, Истиқлолият ва якпорчагии давлат саҳм гузоштааст, қарори раиси вилояти Суғд Қоҳир Расулзода аз 14 феврали соли 2011 «Дар бораи таҷлили 18 — солагии таъсисёбии Қувваҳои Мусаллаҳи Ҷумҳурии Тоҷикистон» ба тасвиб расид.    Тибқи он ин сана дар қаламрави вилояти Суғд ботантана таҷлил мегардад. Раёсати тандурустӣ, Сарраёсати ҳифзи иҷтимоии аҳолии вилоят якҷоя бо Шӯрои собиқадорони комиссариати ҳарбии вилоят барои расонидани хизмати кафолатноки тиббӣ ва ҳифзи иҷтимоии собиқадорони Қувваҳои Мусаллаҳ, ҷанговарони байналмилал, ҳимоятгарони сохти конститутсионӣ дар Ҷумҳурии Тоҷикистон тадбирҳои зарурӣ меандешанд.    Аз хадамоти матбуоти раиси вилояти Суғд ба АМИТ «Ховар» иттилоъ доданд, ки дар рӯзи ҷашн дар Муассисаи давлатии “Кохи Рӯдакӣ” баргузории барномаи консертӣ бо иштироки устодони санъат дар назар аст.