ОМОДАГӢ БА САНАҲОИ ПУРШАРАФ

Турсунзода, 7 феврал. (АМИТ «Ховар», Ҳотам Рабиев).- Мақомоти иҷроияи ҳокимияти давлатии шаҳри Турсунзода баҳри бо дастовези арзанда истиқбол гирифтани ҷашнҳои мубораки 20 солагии Истиқлолияти давлатии Ҷумҳурии Тоҷикистон ва 100 солагии зодрӯзи шоири машҳур устод Мирзо Турсунзода сохтмон ва ба  истифодадиҳии  46 иншооти ҷашниро ба нақша гирифтааст. Аз ҷумла, сохтмони 4 мактаби замонавӣ, бинои осорхонаи марказӣ, маркази ташхисию тиббӣ бо 5 бунгоҳи тиббию саломатӣ, терминали замонавии мусофирбар ва 12 бинои замонавии хизматрасонии маишӣ дар маркази шаҳр аз ин ҳисобанд. Ҳамчунин дар  ноҳия тибқи нақша нерӯгоҳи хурди барқи обии «Ширкент-3» бо иқтидори 576 киловат/соат, ду бинои марказии фарҳангӣ дар маҳалҳо, ду иншооти обтаъминкунӣ дар деҳот, ҳамчунин 18 нуқтаи хизматрасонӣ ва савдо сохта мешаванд.