ШУМОРАИ НАҶОТДИҲАНДАГОН МЕАФЗОЯД?

   Душанбе, 8 феврал. (АМИТ «Ховар», Лаззат Диловарзод). — Бино ба иттилои сардори Раёсат оид ба наҷотдиҳии Кумитаи ҳолатҳои фавқулодда ва мудофиаи гражданӣ (КҲФ ва МГ)- и ҶТ Олег Пилкевич,  Агентии наҷотдиҳии ҳукумати Шветсия  наҷотдиҳандагони (КҲФ ва МГ) – и Ҷумҳурии Тоҷикистонро бо маблағи 400 ҳазор евро бо таҷҳизоти навтарини техникӣ таъмин менамояд.    Ба гуфти Олег Пилкевич, таҷҳизоти наҷотдиҳии  ба Тоҷикистон овардашуда  аз асбобу анҷоми гидравликӣ, пневматикӣ ва оптикӣ иборат буда, дар корхонаҳои Нидерландия аз ҷониби мутахассисони он сохта шудаанд. Ин таҷҳизот  дар корҳои ҷустуҷӯӣ ва наҷотдиҳии зарардидагони зери харобиҳои   офати табии   монда мавриди истифода қарор мегиранд.    Айни ҳол аз рӯи воҳиди корӣ дар КҲФ ва МГ  150 нафар мутахассисони корозмуда дар шароити мураккаби табиии ҶТ фаъолият доранд, ки  ин  хеле кам мебошад. Дар сурати беҳ шудани шароити    молиявии наҷотдиҳандагон  шумораи мутахассисон  низ  чанд маротиба зиёд хоҳад шуд, — иброз дошт О. Пинкевич.